Rullestolteknikkkurs
Ti terapeutar og idrettspedagogar fekk prøve ut kvardagen i rullestol
Deltakarane sat i rullestol begge kursdagane. Foto: Unni Moen
Rullestol er eit avgjerande hjelpemiddel for mange menneske. Likevel finnast det få kurs og utdanningsmoglegheiter for fagpersonar som ønskjer å hjelpe menneske som nyttar rullestol. Det vil møteplassen Heile laget - fysisk aktivitet og idrett for alle, med førsteamanuensis og Phd. ved HVL, Unni Moen i spissen, gjere noko med.
Rullestolkurs for fagpersonar
Møteplassen Heile laget arrangerte difor rullestolteknikkkurs for fagpersonar som jobbar tett på menneske som nyttar manuell rullestol 13.-14.oktober. Ti fysioterapeutar, ergoterapeutar og idrettspedagogar som jobbar i kommunhelesetenesta i Bergen eller omegn, i rehabiliteringsintutisjonar og i spesialisthelsetenesta deltok på kurset.
Teoretisk og praktisk erfaring
Kurset vektla teoretisk kunnskap og praktisk erfaring om korleis dagen ser ut for ein som brukar manuell rullestol og kva ferdigheiter som trengs for å kunne leve det livet ein ønskjer. Kursdeltakarane måtte tilpasse sin eigen rullestol som dei sat i gjennom heile kurset. Dei tok den også med seg rullestolen heim mellom dei to kursdagane for å prøve sin eigen kvardag i rullestol. Per Christian Brunsvik, som sjølv har over 30 års erfaring med å leve i rullestol, formidla viktige funksjonar som er essensielle å mestre i rullestol og som terapeutar difor må legge inn i si trening med pasientar. Kursdeltakarane fekk bl.a. lære å trille over dørtersklar, opp og ned fortauskantar i ulike høgder, opp og ned bakkar, presis manøvering mellom folkemengder og erfaringar med å møte omgjevnadane frå ei sittande stilling.
Behov for auka kompetanse
Det blei også gode faglege diskusjonar og erfaringsutvekslingar om ansvarsområder i opplæringa, samarbeid i hjelpemiddelformidling, generelt kunnskapsbehov blant terapeutar og brukarar av rulklestol. Det kjem klart fram at dette er eit fagområde som er underkommunisert i praksis, og at det er behov for auka kompetanse på vurdering og tilpasning av riktig rullestol og opplæring i bruk av den.
Vi takkar Heile laget, Unni Moen og Per Christian Brunsvik for å ha arrangert eit viktig kurs, og håpar på fleire kurs i framtida!
